Kryetari i Prishtinës, Përparim Rama, ka njoftuar të hënën se Kryeqyteti do të krijojë një ndërmarrje të re publike komunale për pastrimin dhe menaxhimin e mbeturinave.
Rama, së bashku me nënkryetarët Florian Dushi dhe Besiana Musmurati, gjatë një konference për media ka thënë se vendimi është marrë pas takimeve me kryetarët e komunave që janë pjesë e Kompanisë Rajonale të Mbeturinave “Pastrimi”, si dhe me menaxhmentin dhe punëtorët e kësaj kompanie.
Sipas Kryeqytetit, aktualisht Prishtina mbulon pjesën kryesore të punës së Kompanisë Rajonale “Pastrimi”, e cila ofron shërbime edhe në Obiliq, Fushë Kosovë, Lipjan, Podujevë dhe Drenas.
“Ky sistem nuk po arrin më t’u përgjigjet nevojave të Kryeqytetit”, thuhet në njoftimin e Komunës së Prishtinës.
Kryeqyteti ka kritikuar edhe vonesat lidhur me një marrëveshje me bankën gjermane KfW, e cila, sipas Komunës, parasheh investim prej 74.1 milionë eurosh në sistemin e pastrimit dhe menaxhimit të mbeturinave.
Sipas Kryeqytetit, që nga viti 2024 marrëveshja nuk është nënshkruar nga ministri në detyrë i Financave, Hekuran Murati, ndërsa Komuna pretendon se i ka përmbushur të gjitha obligimet e saj.
“Pasojat e këtij bllokimi po i bartin qytetarët e Prishtinës”, thuhet në njoftim.
Komuna ka bërë të ditur se punëtorët e Kompanisë “Pastrimi” nuk do të mbeten pa punë dhe se ata do të përfshihen në sistemin e ri.
Kryeqyteti gjithashtu ka theksuar se, bazuar në Ligjin për Kryeqytetin, për krijimin e ndërmarrjes së re nuk nevojitet pëlqimi i Qeverisë.