Presidenti malazez, Milo Gjukanoviq, është nderuar nga i pari i kryeqytetit, Përparim Rama, me dhënien e “Çelësit të Qytetit”.
Kryetari i Prishtinës, Përparimi Rama, ka folur lidhur me vizitën e presidentit të Malit të Zi, Milo Gjukaonoviq.
“Nder i madh të mirëpresim sot këtu në Kryeqytet, Presidentin e Malit të Zi, Milo Gjukanoviq”, ka shkruar Rama në Facebook.
Vendimin për t’ia dhënë e “Çelësin e Qytetit” presidentit të Malit të Zi, Milo Gjukanoviq, i pari i Prishtinës e ka bërë në shenjë mirënjohjeje e respekti.
“I dorëzuam çelësin e Kryeqytetit, duke synuar forcimin e vazhdueshëm të marrëdhënieve mes dy shteteve tona në çdo aspekt”, ka thënë Rama.
Ndërsa, Presidenti malazias ka thënë se çelësi është dhuratë e bukur për miqësinë e të dyja vendeve.
Milo Gjukanoviq ka theksuar se shteti i Malit të Zi e mbështet aplikimin e Kosovës në Këshillin e Evropës.
Ndërsa gjatë ditës së mërkurë, i pari i Malit të Zi është pritur nga presidentja e Republikës së Kosovës, Vjosa Osmani.
Agjenda e takimeve në Kosovë ishte e ngarkuar për presidentin e Malit të Zi, Milo Gjukanoviq, ku ky i fundit është pritur edhe nga i pari i kuvendit të Kosovës, Glauk Konjufca.
Gjukanoviq ka folur edhe për raportet në mes të Kosovës dhe Serbisë, duke thënë se vendi i tij e mbështet dialogun politik që ekziston ndërmjet këtyre dy shteve, dhe se beson që vetëm dialogu politik mund të dërgojë deri te një marrëveshje gjithëpërfshirëse.
Sipas tij, është e rëndësishme që Kosova të jetë konsistente në këtë proces politik.
Ai, po ashtu, ka shtuar se problemi politik i pazgjidhur midis Kosovës dhe Serbisë, nuk ka të bëjë vetëm me dy shtetet, por prek gjithë rajonin.