Komuna e Prishtinës ka njoftuar se, me vendim të Drejtorisë së Shërbimeve Publike, është lejuar përkohësisht operimi i parkingjeve private në territorin e kryeqytetit për një periudhë prej 30 ditësh.
Sipas njoftimit, vendimi është marrë për të siguruar funksionimin normal të trafikut dhe për të menaxhuar kërkesën e shtuar për hapësira parkimi gjatë sezonit veror, deri në përfundimin e procedurave administrative për pajisjen e operatorëve me lejet përkatëse.
Komuna ka bërë të ditur se lejimi i përkohshëm vlen vetëm për parkingjet që përmbushin kushtet e përcaktuara nga autoritetet komunale. Këto parkingje nuk duhet të pengojnë trotuaret, hyrje-daljet, qasjen për këmbësorë, lëvizjen e automjeteve emergjente apo qarkullimin normal rrugor.
Po ashtu, është theksuar se kjo është një masë e përkohshme, e cila obligon operatorët që brenda afatit të përcaktuar të përfundojnë të gjitha procedurat administrative dhe të plotësojnë kushtet ligjore e teknike, në përputhje me legjislacionin në fuqi.