Këtë të enjte, Kuvendi Komunal i Prishtinës ka miratuar propozimin për falje të tatimit në pronë në vlerë 75 euro.
Ky propozim u miratua me 28 vota pro dhe asnjë abstenim.
Në seancën e kuvendit komunal, në të cilën nuk morën pjesë asamblistët e LDK-së dhe as kryetari Përparim Rama, partitë politike u dakorduan që shuma e falur për tatimin në pronë të jetë 75 euro, e jo 100 sa ka qenë mundësia e paraparë.
Kryesuesja e Kuvendit Komunal, Nora Kelmendi, ka thënë se tatimpaguesit që kanë paguar faturën e tatimit në pronë për këtë vit, shuma e falur do t’i llogaritet si paradhënie për vitin 2024.
“Miratohet vendimi për faljen e tatimit në pronën e paluajtshme për vitin tatimor 2023. Falja e tatimit për pronën e paluajtshme vlen për të gjithë tatimpaguesit e kryeqytetit për vitin tatimor 2023. Shuma për faljen e tatimit në pronë do të jetë jo më shumë sesa 75 euro. Në rast se tatimpaguesit kanë paguar faturën e tatimit për pronën e paluajtshme për vitin 2023, shuma e falur llogaritet si paradhënie për vitin 2024”, ka thënë Kelmendi.
Ky vendim pritet të hyjë në fuqi shtatë ditë pas publikimit në uebfaqen e komunës.