Kryetari i komunës së Prishtinës, Përparim Rama, të enjten e 15 dhjetorit ka nënshkruar marrëveshjen për kredi prej 10 milionë eurosh me BERZH-in, e cila do t’i jepet Trafikut Urban, kompanisë komunale të transportit publik në Prishtinë.
Nga, gjithsej, 30 autobusë efiçientë të modelit EURO-IV, gjashtë prej tyre do të jenë autobusë elektrikë.
Kështu ka bërë të ditur vetë kryetari i kryeqytetit, Përparim Rama, përmes një postimi në Facebook.
“30 autobusë të rinj në kryeqytet, gjashtë prej tyre autobusë elektrikë. Sot nënshkruam Marrëveshjen për Kredi prej 10 milionë eurosh me BERZh, në selinë e tyre në Londër, për blerjen e 6 autobusëve elektrikë dhe 24 autobusëve efiçientë të modelit EURO-IV”, ka shkruar ai.
Sipas Ramës, inkorporimi i autobusëve të parë elektrikë në qytet dhe në vend është një moment kyç drejt tranzicionit të gjelbër.
“Kjo do të ketë një ndikim të prekshëm në jetën e qytetarëve tanë dhe do të ndërmarrë hapa kuptimplotë drejt një Prishtine më të shëndetshme dhe më të pastër. Shumë krenarë që vazhdojmë një bashkëpunim të ngushtë me partnerin tonë BERZH”, shtoi Rama.