Ish-pjesëtarët e Ushtrisë Çlirimtare të Kosovës (UÇK), po kërkojnë protesta. Të paktën kështu po thotë ushtruesi i detyrës i Organizatës së Veteranëve të Luftës (OVL), Faton Klinaku.
Ai përmes një postimi në Facebook, ka thënë se ka kërkesa të vazhdueshme të veteranëve për të protestuar.
Klinaku i ka ftuar ata që të rrijnë gati dhe ka bërë të ditur se është duke bërë takime me degët e OVL-së, për organizimin e mundshëm të një proteste në coftë se kërkesat e tyre nuk merren parasysh.
“Veteranët që po më shkruajnë e po kërkojnë protesta, iu them që të rrijnë gati kurdo që ne i thërrasim për protestë. Për këtë po bëjmë takime me degë”, ka shkruar Klinaku në Facebook.
Kjo organizatë po e kundërshton ndryshimin e ligjit nga Qeveria e Kosovës, që do t’i shkëpuste pensionet e veteranëve të luftës nga rritja e pagës minimale.
Klinaku është shprehur se nësë një gjë e tillë bëhet nga Qeveria e Kosovës, do të ketë protesta masive.
“Sa i përket ndryshimit të ligjit që po përpiqet ta bëjë ky koalicion i papërgjegjshëm qeveritar, me anë të të cilit po do që t’i shkëpus pensionet nga lidhja me pagën minimale, ju them veteranëve se nëse rastësisht e bëjnë është vetëm miratimi i leximit të parë, dhe para se ata ta bëjnë leximin e dytë ne duhet që masovikisht të dalim e t’i bllokojmë”, ka thënë ai.
Tutje Klinaku ka bërë të ditur se për këtë çështje janë në kontakt me përfaqësues të pozitës dhe opozitës.