Të premten e 19 gushtit, ministri i Bujqësisë, Faton Peci, ka njoftuar se rreth shtatë milionë euro janë proceduar për subvencionim të 5 mijë e 715 bujqve.
Ndërsa, përgjatë javës, ministri ka thënë se janë proceduar mbi 12 milionë euro për 8 mijë e 806 bujq.
“E përmbyllim javën me 12,128,781.73 milionë euro të proceduara për pagesë për 8,806 bujq, përfitues të Programit për Pagesa Direkte / Subvencione 2022 për çdo kulturë bujqësore”, ka shkruar Peci në Facebook.
Po ashtu, ai ka bërë të ditur se “afati për sasinë e dorëzuar të grurit është data 2 shtator”.
Ndërsa, pagesën për këtë sasi, në vlerë prej 0.03 €/kg, MBPZHR – AZHB do ta bëjë pas kësaj date, si pagesë të veçantë për të gjithë aplikuesit të kulturës se grurit që dëshmojnë sasinë e dorëzuar të grurit, bazuar në kriteret e parapara me Programin e Pagesave Direkte 2022.