Samiti i Berlinit do t’i bëjë edhe njëherë bashkë krerët e Ballkanit Perëndimor. Mirëpo, në këtë samit do të mungoj Presidenti serb, Aleksandar Vuqiq.
Atë do ta zëvendësoj kryeministrja e Serbisë, Ana Bërnabiq.
Në Berlin pritet të konkretizohen me nënshkrime tri marrëveshje.
Të gjashtë shtetet, pas një periudhe intenzive dialogu, janë dakorduar për njohjen reciproke të letërnjoftimeve, të diplomave universitare dhe të kualifikimeve profesionale.
Këtë e ka konfirmuar zëdhënësi i Qeverisë, Përparim Kryeziu.
“Marrëveshjet pritet të nënshkruhen me 3 nëntor në Samitin e Berlinit. Pas hyrjes në fuqi të marrëveshjeve, fillon edhe konkretisht zbatimi Tregut të Përbashkët Rajonal i cili do të bëjë heqjen graduale të kufizimeve dhe barrierave në katër liritë mes mbi 17 milionë banorëve të Ballkanit Perëndimor”, ka thënë Kryeziu.
Çështja e targave dhe dokumenteve, kanë thelluar edhe më shumë përçarjen mes Kosovës dhe Serbisë.
Mirëpo, nga Lëvizja Vetëvendosje thonë se punën më të madhe për t’i bindur dy shtetet që t’i nënshkruajnë marrëveshjet e ka bërë shteti prej nga erdhi nisma.
“Po besoj që këtë punë e kanë bërë vet Gjermania më konkretisht dhe shtetet e tjera anëtarë të Bashkimit Evropian, të cilat poashtu njëjtë sikurse Gjermania e kanë interesin që të ulen tensionet ndërmjet shteteve të Ballkanit Perëndimor, të krijohet një normalizim”, ka theksuar Kryeziu-Hyseni.
Aktivizimin e “Procesit të Berlinit”, e përkrahin edhe në Lidhjen Demokratike të Kosovës.
“Ne e kemi mbështetur si proces që nga fillimi në vitin 2014, kur është nisur kjo iniciativë, sidomos sa i përket tregut të përbashkët rajonal, i cili parasheh katër liritë themelore, siç është liria e lëvizjes, kapitalit dhe shërbimeve”, është shprehur Mjekiqi.
Përkundër dakordimeve për nënshkrim të marrëveshjeve, Arbër Fetahu nga GLPS nuk e përjashton mundësinë e ndonjë dështimi.
“Mund të kemi befasi edhe në takimin e nesërm, marrë parasysh karakterin e politikës ballkanase, mirëpo duket se do të jetë një takim më shpresdhënës, pasi që edhe qeveria gjermane duket se e ka një përcaktim që të jetë sa më investuese në këtë proces”, ka thënë Fetahu.
Në Berlin, kryeministri Albin Kurti do të takohet edhe me kancelarin gjerman Olaf Scholz, si dhe presidentin francez, Emmanuel Macron, liderë të dy shteteve, prej nga ka ardhur propozimi shumë i diskutuar në publik për marrëdhëniet Kosovë-Serbi.
Për këtë çështje, Kurti, pritet të ketë një takim të ndarë me Scholz e Macron.