Anëtarët e Komisionit të Pavarur për Media (KPM), të premten kanë raportuar për herë të tretë para Komisionit parlamentar për Media lidhur me vendimet e tyre mbi kthimin e kanaleve të “Arena Sport” në platformat kabllore dhe licencimin e Art Motion.
Gjatë diskutimit, anëtarët e KPM-së janë përballur me pyetje të deputetëve të Qeverisë për vendimet e tyre, ndërkohë që shqetësime për ndërhyrje në pavarësinë e KPM-së janë ngritur përsëri.
Deputeti i AAK-së, Besnik Tahiri, ka theksuar reagimet e Bashkimit Evropian dhe Forumit për Integritet në lidhje me Projektligjin për KPM-në.
Ai ka shtuar se, megjithëse demokracia është një proces i vazhdueshëm i ballafaqimit, duhet të ruhet për mos shkelur vijat e kuqe.
Tahiri ka theksuar se ata si deputetë nuk duhet të rrezikojnë pavarësinë institucionale të KPM-së.
“Ne kërkojmë llogari prej këtyre anëtarëve, mirëpo kufiri deri ku ne mund të shkojmë është deri aty ku është përgjegjësi e jona, e më pas është përgjegjësia e tyre. Unë kam disa brenga, po bëhet një diskutim që u bën dëm institucioneve të pavarura. Nëse marrim reagimin BE-së, ata shprehin brengën serioze për ndikimin tonë të një institucion i pavarur. Forumi për Integritet po ashtu ka reaguar për ndikimin në pavarësinë e Këshillit të Pavarur të Mediave”, ka thënë ai.
Në anën tjetër, kryetari i Komisionit Parlamentar për Media, Valon Ramadani, ka deklaruar se ata po respektojnë rregulloren e Kuvendit dhe ligjin për KPM, duke mohuar cenimin e pavarësisë së KPM-së.
“Unë si kryetar i Komisionit, unë jam i bindur që jemi në respektim të Rregullores së Kuvendit por edhe të Ligjit të KPM-së. Ne jemi në rregull dhe nuk jemi duke e cenuar pavarësinë e KPM-së”, ka thënë Ramadani.
Lexo edhe: VV-ja kërkon shkarkimin e Bordit të KPM-së për “rrezikim të sigurisë nacionale me kanalet serbe”
Ndërkaq, deputeti i Vetëvendosjes Armend Muja, i cili nuk është anëtar i këtij Komisioni, ka theksuar se operatori që është licencuar nuk e njeh Kosovën si shtet por e njeh si pjesë të Serbisë.
“Nuk është kjo çështje patriotizmi, është kundërligjore”, ka shtuar Muja.
Tashmë ka përfunduar mbledhja e Komisionit për Administratë Publike, Pushtet Lokal, Media dhe Zhvillim Rajonal, ku vazhduan raportimin anëtarët e Komisionit të Pavarur të Mediave.
Mbledhja është shtyrë për një datë tjetër në mungesë të dokumenteve në shqip.