Prokurorët paralajmërojnë se do të ndjekin penalisht qeverinë pas vendimit për uljen e pagave
Shoqata e Prokurorëve të Kosovës ka kërkuar anulimin e vendimit të Qeverisë së Kosovës për përgjysmimin e pagave të prokurorëve. Po ashtu kjo shoqatë ka njoftuar se përkrah vendimin e Këshillit Prokurorial të Kosovës të marrë të mërkurën në takimin e jashtëzakonshëm për reduktimin e punëve të prokurorive vetëm me shërbime esenciale, për pezullimin e […]





Shoqata e Prokurorëve të Kosovës ka kërkuar anulimin e vendimit të Qeverisë së Kosovës për përgjysmimin e pagave të prokurorëve.
Po ashtu kjo shoqatë ka njoftuar se përkrah vendimin e Këshillit Prokurorial të Kosovës të marrë të mërkurën në takimin e jashtëzakonshëm për reduktimin e punëve të prokurorive vetëm me shërbime esenciale, për pezullimin e të gjitha formave të bashkëpunimit me përfaqësuesit e Qeverisë së Republikës së Kosovës, si dhe për veprimet tjera të që parasheh vendimi i KPK-së.
“Shoqata e Prokurorëve të Kosovës njofton opinionin publik se në koordinim me Këshillin Prokurorial të Kosovës do të ndërmerr veprime konkrete për kontestimin e vendimit të Qeverisë së Republikës së Kosovës për uljen e pagave të prokurorëve, përmes rrugëve ligjore dhe organeve gjyqësore vendimmarrëse”, thuhet në njoftim.
Gjithashtu, thuhet se do të shqyrtohen edhe shkeljet e mundshme të dispozitave të Kodit Penal të Republikës së Kosovës dhe për hapat lidhur me këtë çështje opinioni do të njoftohet me kohë.
Ndryshe, të mërkurën e 23 nëntorit, Qeveria e Kosovës në mbledhjen e 109-të ka shfuqizuar vendimin e nxjerrë në vitin 2017 nga kabineti qeveritar i Ramush Haradinajt për ndryshimin e pagave të gjyqtarëve dhe prokurorëve.



















