Prokuroria Themelore në Prishtinë ka autorizuar hetuesit e Inspektoratit Policor të Kosovës që të ndërmarrin veprime paraprake për trajtimin e rasteve që lidhen me veprimet e zyrtarëve policorë gjatë protestës së mbajtur mbrëmë, më 5 tetor, në hapësirat përreth objekteve të Qeverisë dhe Kuvendit të Kosovës.
Sipas Prokurorisë, qëllimi i autorizimit është grumbullimi i informatave dhe provave relevante lidhur me tejkalimin eventual të autorizimeve policore gjatë përdorimit të forcës për shpërndarjen e protestuesve, njofton Dukagjini.
“Prokuroria Themelore në Prishtinë, në bashkëpunim dhe koordinim të veprimeve me IPK-në, do të ndërmarrë të gjitha masat e nevojshme ligjore me qëllim të ndriçimit të secilit rast ku dyshohet të jetë përdorur forcë përtej nevojës dhe autorizimeve që burojnë nga legjislacioni në fuqi”, thuhet në njoftim.
Prokuroria ka bërë të ditur se do të ndërmarrë të gjitha veprimet hetimore për të sqaruar plotësisht rrethanat e krijuara gjatë protestës.