Autoriteti kompetent në kuadër të institucionit të Prokurorit të Shtetit ka iniciuar procedurën disiplinore ndaj prokurorit që merrej me rastin e tashmë së ndjerës Sebahate Morina.

Këtë e ka bërë të ditur Zyra e Kryeprokurorit të Shtetit pas vendimit të Gjykatës Kushtetuese, që thotë se institucionet e Kosovës kanë dështuar ta mbrojnë jetën e së ndjerës Sebahate Morina e cila u vra nga bashkëshorti i saj.

“Kryeprokurori i Shtetit ka bërë të ditur se pas vendimit të Gjykatës Kushtetuese lidhur me rastin e të ndjerës Sebahate Morina, autoriteti kompetent në kuadër të institucionit të Prokurorit të Shtetit ka iniciuar procedurën disiplinore ndaj prokurorit të këtij rasti. Për epilogun e kësaj procedure opinioni publik do të njoftohet me kohë”, thuhet në njoftim.

Dje dhe sot janë mbajtur aksione protestuese për vrasjen e Sebahate Morinës, ku është kërkuar dorëheqja e prokurorit përgjegjës të këtij rasti.

Mbishkrimi “Shteti fajtor për vrasjen e Sebahate Morinës” është vendosur përballë ndërtesës së Këshillit Prokurorial të Kosovës.

Ndryshe, më 22 mars të këtij viti, Gjykata Kushtetuese e Kosovës ka dalë me vendim për të ndjerën Sebahate Morina, e cila ishte vrarë nga bashkëshorti i saj.

Në vendim thuhet se institucionet e Kosovës, respektivisht, Gjykata Themelore në Gjilan, Prokuroria Themelore në Gjilan, Stacioni Policor në Graçanicë dhe Prokuroria Themelore në Prishtinë, kanë dështuar ta mbrojnë jetën e së ndjerës Sebahate Morina.

Rasti i Sebahate Morinës, protestuesit kërkojnë dorëheqjen e kryeprokurorit të Prokurorisë në Prishtinë