Zëdhënësi i Prokurorisë Themelore në Mitrovicë, Valon Preteni, ka deklaruar se sapo të pranohet dosja lidhur me rastin e plagosjes së një serbi nga Policia e Kosovës, do të kërkohet një masë e sigurisë.
Në një përgjigje për Dukagjinin, Preteni ka thënë se deri tani, katër persona janë të ndaluar lidhur me rastin.
“Deri më tani ende nuk e kemi marrë të gjithë dosjen nga hetuesit policorë, por gjithsesi prokurorja sapo ta pranojë dosjen do të kërkojë masë të sigurisë. Masa e sigurisë do të bëhet varësisht siç parashihet përmes veprave penale që dyshohet se kanë kryer të dyshuarit. Deri më tani kemi një të ndaluar për tri vepra penale dhe tre të tjerë për një vepër penale”, ka thënë Preteni.
Policia e Kosovës ka dhënë detaje lidhur me rastin e ndodhur në orët e vona të së hënës në veri të vendit, ku nga arma e zjarrit ishte plagosur një person. Policia ka bërë të ditur se ka suspenduar një zyrtar policor, i cili dyshohet se është përfshirë në këtë rast.
Kjo pasi policia ka thënë se është arritur të sigurohen dëshmi, të cilat tregojnë dyshimet për përfshirje të mundshme të tij. Përveç ndaj tij, janë marrë masa të suspendimit edhe ndaj tre zyrtarëve të tjerë policorë të mundshëm të përfshirë në këtë rast.
Ndërkaq, mbrëmjen e së martës, ministri i Brendshëm Xhelal Sveçla ka shkruar se bazuar në hetimet e para, pas sinjalit të zyrtarit policor për ndalim, vozitësi nuk është ndalur por ka vazhduar në drejtim të Zveçanit. Si rrjedhojë, një zyrtar policor ka shtënë me armë në drejtim të veturës, ku si pasojë ka mbetur i plagosur qytetari M.J.
Ndër të tjera, Sveçla bëri të ditur se 4 zyrtarë policorë janë arrestuar dhe janë dërguar në mbajtje për 48 orë, nën dyshimin se tre zyrtarë policorë nuk kishin raportuar lidhur me rastin dhe një zyrtar për mosraportim si dhe për përfshirjen e tij në rast.
Ata janë suspenduar nga PK-ja.