Prokuroria Speciale e Republikës së Kosovës i ka cilësuar si “tendencioze” deklaratat e ministres së Drejtësisë, Albulena Haxhiu.
Me anë të një reagimi, Prokuroria ka deklaruar se deklaratat e ministres Haxhiu “servohen vetëm për nevoja të agjendave ditore politike”.
“Prononcimet e paskrupullta publike të Ministres së Drejtësisë, për, kinse, mosveprim dhe neglizhencë të PSRK-së ndaj rasteve të ndryshme, demantohen plotësisht nga aktivitetet dhe raportet zyrtare të PSRK-së që pasqyrojnë dhe tregojnë qartazi të kundërtën e asaj që predikon pandalshëm dhe përditë kjo ministre. Në këtë aspekt, theksojmë se deklarimet e tilla burojnë dhe artikulohen nga pasaktësitë maksimale, nuk kanë të bëjnë asgjë me realitetin dhe janë tërësisht tendencioze ndaj kësaj prokurorie, sepse të thuash se PSRK-ja kontrollon dhe mbikëqyrë vendimet e krejt sistemit prokurorial kinse për verifikimin dhe shkeljen e mundshme të ndonjë ligji, vërtet është një nonsens i llojit të veçantë publik, i padëgjuar dhe krejtësisht imagjinar, gjë që na bënë të vijmë në përfundim se deklaratat e tilla ngritën dhe shuhen në kuadër të spekulimeve, sepse servohen vetëm për nevoja të agjendave ditore politike”, thuhet në njoftim.
Krahas kësaj, ministres Haxhiu i është bërë thirrje nga Prokuroria të përmbahet nga deklaratat si ato të mbrëmshmet, të cilat Prokuroria i konsideroi si tendencë e saj për të ndërhyrë në punën e Prokurorisë.
Sipas Prokurorisë, deklaratat e Haxhiut janë në kundërshtim me ligjin.
“Prandaj, PSRK-ja, me këtë rast, i bënë thirrje Ministres Haxhiu që më në fund të fillojë të përmbahet nga deklaratat e vazhdueshme shantazhuese dhe nënçmuese ndaj PSRK-së dhe ndaj punës së Kryeprokurorit dhe prokurorëve të saj, sepse kjo përbën tendencë të hapur për të ndikuar në punë, për të ndërhyrë në kompetencat dhe në veprimtarinë legjitime të kësaj prokurorie dhe ndaj punës së prokurorëve të shtetit dhe nuk ka se si të quhet ndryshe përveç se si tentativë e pathemeltë dhe e dështuar. PSRK-ja, deklaron se do të punojë dhe veprojë fuqishëm dhe do të mbrojë me të gjitha mjetet juridike-ligjore në dispozicion punën e saj profesionale dhe njëherësh i bënë thirrje publike Ministres së Drejtësisë dhe Qeverisë së Republikës së Kosovës që të lënë anash deklaratat dhe presionet avantureske dhe të kota, të cilat, faktikisht, janë në kundërshtim me ligjet në fuqi dhe Kushtetutën e Republikës së Kosovës.”, thuhet në njoftim.
PSRK-ja deklaron se do t’i shkojë deri në fund çdo rasti që është në dëm të institucioneve dhe të qytetarëve të Republikës së Kosovës, pavarësisht se kush është, në çka beson dhe çfarë ka bërë dhe çfarë bën.
Ministrja e Drejtësisë, Albulena Haxhiu, kishte deklaruar gjatë mbrëmjes të së mërkurës se Prokuroria Speciale po i hakmerret qeverisë Kurti.