Gjatë ditës së djeshme, Prokuroria e Lartë Publike në Beograd ka paraqitur ankesë kundër vendimit të gjyqtarit për procedurën paraprake të Gjykatës së Lartë në Beograd, i cili ka refuzuar propozimin e kësaj prokurorie për të caktuar paraburgimin e Milan Radoiçiqit për shkak të rrezikut të arratisjes.

Prokuroria e Lartë Publike në Beograd ka kërkuar ndryshimin e vendimit dhe ndalimin e Radoiçiqit.

Vendimi për ankesën duhet të merret nga trupi penal jogjykues i Gjykatës së Lartë në Beograd.

Radoiçiq u mor në paraburgim më 3 tetor, kur u mor në pyetje dhe u urdhërua të mbahej në paraburgim policor deri në 48 orë. Megjithatë, ai u lirua një ditë më vonë, pasi gjykatësi refuzoi ta paraburgoste.

Ndryshe, autoritetet serbe të mërkurën e kanë liruar nga mbajtja Milan Radojiçiqin, që institucionet e Kosovës po e dëshirojnë nën pranga, pasi udhëhoqi sulmin ndaj Policisë së Kosovës më 24 shtator në Banjskë.

Në anë tjetër, pikërisht, në kohën kur Kosova po tenton ta ekstradojë, institucionet e Serbisë ia ndaluan Radojiçiqit hyrjen në Kosovë, shtetin ku kreu krimin.

Madje, atij iu konfiskua edhe pasaporta.