Zëdhënësja e Prokurorisë Speciale, Arbnora Luta, ka bërë të ditur se Prokuroria ka paraqitur kërkesë për caktimin e masës së paraburgimit ndaj dy personave të dyshuar për krime lufte të kryera në fshatin Kalludër e Vogël në Zubin-Potok.
Luta ka theksuar se për momentin nuk mund të jepen komente lidhur me procesin e gërmimeve që po zhvillohet në Zubin-Potok, ku ekziston dyshimi për një varrezë masive.
Ajo ka sqaruar se çdo konfirmim zyrtar mund të bëhet vetëm pas përfundimit të ekzaminimeve mjeko-ligjore dhe identifikimit nga institucionet kompetente.
Njëkohësisht, Prokuroria Speciale u ka bërë thirrje publikut dhe mediave që të tregojnë kujdes në publikimin e informacioneve të pakonfirmuara lidhur me këtë rast, në shenjë respekti për viktimat, identitetin e tyre, familjarët dhe vetë procesin hetimor.
“Nuk mund të komentojmë procesin që është duke u zhvilluar rreth gërmimeve në Zubin-Potok. Çdo konfirmim mund të bëhet vetëm pas përfundimit të ekzaminimeve mjeko-ligjore dhe identifikimit nga insitucionet kompetente. I bëjmë thirrje të gjithëve, publikut, mediave, që të ruhen nga publikimi i çdo informacioni të pakonfirmuar, në shenjë respekti ndaj viktimave, identitetit të tyre, familjarëve të tyre dhe këtij procesi hetimor”, u shpreh Luta.