Prokuroria Speciale e Kosovës ka ngritur aktakuzë ndaj të pandehurit me inicialet K.Xh., nën dyshimin se ka kryer veprën penale “Kanosja”.
Sipas aktakuzës, më 22 tetor 2025, K.Xh., me dashje dhe me qëllim të frikësimit të personit zyrtar lidhur me punën dhe pozitën e tij zyrtare si Kryeministër i Republikës së Kosovës, publikisht e ka kanosur të dëmtuarin A.K.
Prokuroria Speciale bën të ditur se i pandehuri e ka kanosur kryeministrin përmes rrjetit social Facebook, duke i thënë se do ta “privojë nga jeta”.
Me këto veprime, K.Xh. akuzohet për kryerjen e veprës penale “Kanosja”.
Rasti thuhet se i është përcjellë për shqyrtim Gjykatës Themelore në Prishtinë, Departamentit Special.