Të hënën e shtatë nëntorit, Prokuroria Speciale e Kosovës, ka shënjestruar një rast të ri të krimeve të rënda, ku janë të përfshirë 14 persona.
Në njoftimin e Prokurorisë Speciale të Kosovës, thuhet se kryeprokurori i Prokurorisë Speciale të Republikës së Kosovës, Blerim Isufaj, ka mbajtur takimin e radhës me ekipin e përbashkët për përzgjedhjen dhe shënjestrimin e krimeve të rënda, këtë të hënë.
“Kanë shënjestruar një rast të ri me katërmbëdhjetë persona”, thuhet në njoftim.
Tutje, Prokuroria Speciale njofton se rasti i shënjestruar është i koduar me emrin “Skema”, për veprën penale “Shpëlarja e parave”, nga neni 302 të KPRK-së, dhe lidhur me nenin 56, paragrafi 1 të Ligjit nr. 05/L-096 për Parandalimin e Pastrimit të Parave dhe Luftimin e Financimit të Terrorizmit.