Ish-këshilltari i kryeministrit Albin Kurti, Durim Berisha, përmes një postimi në Facebook, ka bërë të ditur se ka parashtruar një kërkesë në zyrën e Kryeprokurorit të Shtetit për inicimin e një hetimi mbi mënyrën e pajisjes me pasaportë diplomatike të Valdrin Sahitit.
Në dokumentin e postuar, bëhet e ditur se parashtresën e tij e kanë dërguar në kompetencë të Kryeprokurorit të Prokurorisë Themelore në Prishtinë, pasi ajo prokurori ka kompetencë për ta hetuar këtë rast.
“Lidhur me këtë, ju njoftojmë se parashtresën e juaj, ia kemi dërguar në kompetencë Kryeprokurorit të Prokurorisë Themelore në Prishtinë, pasi ajo prokurori ka kompetencë për t’i zhvilluar hetimet”, thuhet në njoftimin me shkrim që Berisha ka marrë nga zyra e Prokurorit të shtetit, në kuadër të Kryeprokurporisë.
Sipas Berishës, i mbetet institucioneve të drejtësisë të konsiderojnë nëse shitja e fustaneve konsiderohet interes i jashtëzakonshëm shtetëror.
Lidhur më këtë çështje, Këshilltari për media i presidentes, Bekim Kupina, kishte deklaruar se presidentja nuk ka kompetencë për të lëshuar pasaporta diplomatike.
“Presidentja as nuk lëshon e as nuk merr pasaporta diplomatike. Pra nuk i ka lëshuar pasaportë diplomatike asnjëherë askujt. Për qindra pasaporta të raportuara në media, pyetjet duhet të drejtohen tek Qeveria paraprake, sepse janë lëshuar gjatë qeverisjes së tyre”, ishte shprehur Kupina.