Më një shtator të vitit 2022, Kryeministri i Kosovës, Albin Kurti dhe Ministrja e Arsimit, Shkencës, Teknologjisë dhe Inovacionit, Arbërie Nagavci dhe homologia e saj Ministrja e Arsimit të Shqipërisë, Evis Kushi janë duke promovuar Abetaren e përbashkët në qytetin e Gjakovës, për Kosovën dhe Shqipërinë.
Përveç këtyre udhëheqësish, në ceremoni janë duke marrë pjesë edhe anëtarë të Komisionit Parlamentar për Arsim, nga të dyja vendet.
Të mërkurën e 31 gushtit, shtëpia botuese “Dukagjini”, ka prezantuar abetaren e unifikuar.
Kjo abetare vjen si rezultat i bashkëpunimit të të dy ministrive të Arsimit, si dhe dy shtëpive botuese fituese “Dukagjini” dhe “Pegi”.
“Abetarja e re vjen si paketë e kompletuar, e përbërë nga: Libri i nxënësit, Fletorja e punës, Libri i mësuesit dhe versioni digjital i Librit të nxënësit. Për këtë moshë nxënësish, është e rëndësishme që të mësojnë nga kombinimi tekst-ilustrim, që e karakterizon Abetaren e re”, thuhet në njoftim.
Po ashtu thuhet se çdo tekst në abetare ka vlerë edukative, saktësi shkencore dhe është në përputhje me moshën, mundësitë njohëse dhe interesat e nxënësve.
Abetarja vjen edhe në versionin digjital, ku nxënësit përmes interaktivitetit, mund t’i shikojnë videot e njësive mësimore, t’i shkruajnë shkronjat, t’i zgjidhin detyrat e dhëna dhe të marrin përgjigje automatike për saktësinë e tyre.