Ushtria izraelite ka njoftuar OKB-në me një urdhër që kërkon zhvendosjen e pothuajse të gjithë banorëve të veriut të Gazës në jug të këtij territori brenda 24 orëve të ardhshme.

Hamasi, grupi militant i cili kontrollon Gazën, i është kundërpërgjigjur këtij urdhri.

Një zyrtar i Hamasit e ka karakterizuar si “propagandë të rreme” urdhrin e Izraelit dhe i ka këshilluar qytetarët e veriut të Gazës ta injorojnë këtë paralajmërim.

Grupi militant është kritikuar prej kohësh nga komuniteti ndërkombëtar për përdorimin e civilëve si mburoja njerëzore, duke i ekspozuar ata ndaj rreziqeve të panevojshme për të mbrojtur luftëtarët e tyre, raporton BBC.

Hamasi mori pushtetin në Rripin e Gazës pasi fitoi zgjedhjet legjislative në vitin 2006 dhe pastaj përforcoi pushtetin e tij në Gaza vitin e ardhshëm, rrëzuar lëvizjen rivale Fatah të presidentit Mahmud Abbas.

Tensionet mes këtyre dy grupeve janë vazhdimisht të pranishme në këtë rajon.

Ndërkaq, Organizata e Kombeve të Bashkuara (OKB) njoftoi të premten herët se më shumë se 400.000 njerëz kanë ikur nga shtëpitë e tyre në Rripin e Gazës dhe se 23 punonjës humanitarë janë vrarë qëkur Izraeli i nisi bombardimet hakmarrëse ndaj sulmit nga militantët e Hamasit në Izrael në fundjavë.

OKB-ja i ka kërkuar gati 300 milionë dollarë për t’i ndihmuar rreth 1.3 milionë civilë në Gaza dhe në Bregun Perëndimor, kryesisht për ndihma ushqimore, pasi furnizimi me ushqim po mbaron.