Një herë e shtynë, por protesta e dytë duket se ka qenë e pashmangshme.
Mesditën e së shtunës, pjesëtarë të dy njësive elite të Policisë, do të stacionohen para Qeverisë për të shprehur edhe një herë tjetër paknaqësitë e tyre.
Por protesta e së shtunës, do të jetë ndryshe nga ajo e para, e mbajtur më shumë se 1 muaj më parë.
Kjo pasi Njësisë Speciale Intervenuese dhe Njësisë për Trajtimin e Mjeteve Eksplozive, siç ka marrë vesh televizionin Dukagjini, do t’i bashkohën edhe zyrtarë të njësive tjera, madje edhe efektiv me pozita udhëheqëse në këtë institucion.
Gjithashtu, kësaj here do t’i bashkohen edhe Sindikata e Policisë.
Legjitim e të drejtë po e quan këtë hap të radhës së Policisë, njohësi i sigurisë Valdet Hoxha.
Njohës i Sigurisë, Valdet Hoxha ka theksuar se “jo vetëm për orët shtesë por edhe për rrezikshmërinë do të duhej të ju plotësohej dhe po besoj që cdo shtyrje e këtij afati është injorim jo vetëm i kërkesave por edhe i tërë strukturës policore”
Ndonëse ka mundësi të mos bashkohën të gjithë pjestarët e Policisë, sipas Hoxhës, Njësia Speciale Intervenuese është zëri i të gjithë institucionit.
Hoxha ka shtuar se “unë po besoj që NJSI në një mënyrë është përfaqësuese e të gjithë njësive tjera për shkak të rolit specific që ata e kanë dhe do ta kenë të ardhmën në ushtrimin e detyrave dhe autorizimeve policore”
Njësia Speciale Intervenuese ishte pikërisht kjo njësi që i bëri ballë sulmit terrorist në Banjkë të Zvecanit në fund të shtatorit, që konsiderohet ndër më të suksesshsimt të Policisë së Kosovës.
Pjesëtarët e NJSI-së dhe asaj për trajtimin e Mjeteve Eksplozive, protestuan më 1 nëntor, duke kërkuar shtesa më të larta për rrezikshmëri e përfshirje në listën e ekspertëve.
Protesta e dytë e paralajmëruar, ishte pezulluar pas një takimi që ishte parlajmëruar me kryeministrin Kurti, por që i njëjti, pavarësisht se u zhvillua, duket se nuk dha efekt për t’i bindur zyrtarët policor, që të heqin dorë nga protesta.