Qeveria e Kosovës të shtunën u mbulua nga tymi i zi. Kjo ishte një ndër format e kundërshtimit të marrëveshjes së panënshkruar të Ohrit, e specifikisht përfshirjes së Asociacionit të Komunave me shumicë Serbe.
Protesta e organizuar nga Partia Socialdemokrate përfshiu edhe zëvendësimin e flamujve të Kosovës me flamuj të bardhë, që sipas saj, simbolizonte dorëzimin e Albin Kurtit ndaj Aleksandar Vuciq.
Kryetari i PSD-së, Dardan Molliqaj tha se Kurti pos që ka ndryshuar emrin e Asociacionit në vetmenaxhim, edhe vetes ia ka vënë mbiemrin Zajednicë.
“Refuzimi i ripërcaktimit të kufijve duke etiketu Shtëpinë e Bardhë, duke e përjashtu Luginën e Preshevës e në anën tjetër tu e pranu Zajednicën në villën e Titos, nuk është e rastësishme sepse kur e refuzon ripërcaktimin e kufnjëve automatikisht e refuzon bashkimin ndërsa kur e afirmon Zajednicën ska qysh me afirmu edhe nostalgjinë ndaj Titos”, ka thënë Dardan Molliqaj – Kryetar i PSD-së.
Numri i protestuesve që iu bashkuan marshit nga sheshi “Zahir Pajaziti” deri te Qeveria nuk ishte aq i madh sa kur Kurti e kundërshonte Asociaconin sa ishte në opozitë.
Por gjithsesi, qytetarët që iu bashkuan kësaj proteste janë dëshpruar shumë nga shkelja e premtimeve të Kurtit.
“Sot jam dal me i thanë Albinit, pse je mashtrues e pse po rren. Pse e ke marrë votën mos me bo e sot po e bon ma shumë se asociacion, po e bon autonomi me pikën shtatë”, ka deklaruar Shaip Hajrizi – Qytetar.
“Ky me ato premtimet e veta për Zajednicën, ja skena me pranu, ja ska Zajednicë e sot u qu edhe e pranoj Zajednicën, mashtrim më i madh, rren ma e madhe e dul që ky ish kanë demagog i madh”, ka theksuar Shaqir Bashkimi – Qytetar.
Protestës së sotme iu bashkuan edhe zyrtarë të Partisë Demokratike të Kosovës, Nismës Socialdemokrate dhe anëtarë të Organizatave të dala nga lufta.
Ajo përfundoi e qetë dhe pa incidente.