Për më shumë se një orë rruga tranzit që lidh qytetin e Shtimes me atë të Prizrenit ka qenë e bllokuar.
Kamionë të shumtë u vendosen në këtë rrugë, nga kompani të ndryshme transportuese, në shenjë proteste për gjendjen e rrugës.
E paasfaltuar e me gropa të shumta është tash e rreth dy vite, kjo rrugë që është alternativa e vetme e shumë kompanive e qytetarëve.
“Është shumë i shkatërruar kanë filluar punimet, është dhënë projekti, ja kanë nis punimet e kanë dëmtuar rrugën, e i kanë hequr mjetet motorike dhe e kalë kështu rrugën, ne cdo ditë ballafaqohemi me defekte, me probeleme me shpenzime marramendëse, me shpenzime tona dhe është e papërballueshme për neve, dhe ajo na ka shtyer që sot të dalim në protestë”, ka deklaruar Armend Abazi, përfaqësues i kompanive transportuese në Shtime.
Kjo gjendje po i pengon banorët e fshatit Davidovc, të cilët thonë se edhe pluhuri po u shkakton telashe të shumta.
“Për neve si banorë rruga nuk qonë shumë peshë, por qon peshë për tjerët, për neve qon peshë shumë të rëndë pluhuri i madh, pluhuri që njerëzit e kësaj lagje nuk mujn me qelë as dritare smunden me dal as nëpër tarasat e tyre, as nuk mundemi me nejt jashtë se është pluhur jashtëzakonisht i madh”, ka thënë Remzi Zeqiri, banor.
“Nëse nuk vazhdojnë punimet, ne do vazhdojmë prap me protesta nashta edhe kemi me i vështirësu, kemi me i bë më të ashpra protestat, nashta do bllokojmë edhe rrugë. Por kjo është rrugë që e lidhë Prishtinën, Prizrenin e edhe Shkupin, e lidh Tiranën nuk është rrugë e vogël kjo, edhe me mbet kjo qe dy vite pa u asfaltuar kjo është marre për qeverinë”, ka thënë Arben Bajrami, protestues.
Vlera e këtij projekti në pllakën informuese te vendosur, është mbi 1 milionë euro, dhe përgjegjëse është Ministria e Infrastrukturës.
Nga kjo ministri nuk kanë kthyer përgjigje, se për cilat arsye nuk është rregulluar kjo rrugë, derisa nga komuna e Shtimes, kanë thënë se nuk kanë asnjë kompetencë për të.