Protesta e studentëve në Shqipëri është përshkallëzuar gjatë ditës së dytë, me përplasje të vazhdueshme mes protestuesve dhe policisë në Tiranë.
Situata vijon të jetë e tensionuar pranë Kryeministrisë në Tiranë, ku protestuesit i kanë vënë flakën një biznesi privat në katin e parë të dy kullave përballë Piramidës, ndërsa flakët dhe tymi kanë përfshirë objektin dhe policia po përdor gaz lotsjellës për të shpërndarë protestuesit.
Gazetarja e TV Dukagjinit, Blerta Zuka, ndodhet në Tiranë, ku po përcjell nga afër protestën dhe do të na sjellë më shumë informacione për zhvillimet e fundit.
Protestuesit janë vendosur para Parlamentit, ku kanë hedhur gurë dhe koktej molotovi drejt kordonit policor, ndërsa policia ka krijuar një gardh për të penguar hyrjen e tyre në institucion.
Më herët, protestuesit kishin hyrë edhe në objektin e Ministrisë së Arsimit, ndërsa kanë sulmuar me gurë, koktej molotovi dhe fishekzjarrë edhe objektet e Ministrisë së Financave dhe Ministrisë së Brendshme, si dhe Piramidën e Tiranës.
Përplasjet mes protestuesve dhe policisë po vazhdojnë.
Policia po tenton ta shpërndajë turmën duke përdorur gaz lotsjellës dhe ujë, ndërsa protestuesit po hedhin gurë, koktej molotovi dhe fishekzjarrë.
Gjatë protestës është raportuar edhe për arrestime dhe persona të lënduar. Sipas njoftimit nga Spitali i Traumës, aty po trajtohen tre protestues dhe katër policë, gjendja e të cilëve është stabile.
Për zhvillimet në kryeqytetin shqiptar ka reaguar edhe presidenti Bajram Begaj, i cili u ka bërë thirrje palëve për vetëpërmbajtje dhe përgjegjësi.
Begaj pas tensioneve në Tiranë: Dhuna nuk mund të jetë mjet i shprehjes së pakënaqësisë