Partia Socialdemokrate (PSD), me rastin e dyvjetorit të Qeverisë Kurti II në pushtet, ka mbajtur një aksion simbolik ku aktivistët e kësaj partie kanë vizatuar një vijë të verdhë në objektin e Qeverisë.
Sipas Zgjim Hysenit, anëtar i kryesisë së PSD-së, kjo vijë nënkupton punë të njëtrajtshme dhe pa progres të qeverisë.
“Rrahje gjoksi e rritje e mendjes; shumë fjalë, shumë numra, shumë shifra. Para 2 vjetëve na thanë se ndodhi diçka e madhe, e jashtëzakonshme. A e dini çfarë ndodhi para 2 vjetëve? Bash asgjë”, ka thënë Hyseni, raporton EO.
Sipas PSD-së, në këtë gjysmë mandati, kjo Qeveri nuk e ka pasur programin transformues.
“Edhe sikur ta zbatonte s’do të bëhej nami. Problemi është që këta as nuk kanë filluar. Nuk ia kanë bërë vijë”, thuhet në komunikatën e PSD-së.
PSD-ja thotë se Qeveria aktuale ka premtuar ndërtimin e 160 çerdheve, dymijë banesave për çiftet e reja, pesëfishim të inspektorëve të punës e rregullim të shëndetësisë, por, sipas kësaj partie, Qeveria nuk e ka realizuar asnjërën.