Të martën e tetë nëntorit, Partia Socialdemokrate (PSD) ka zhvilluar një aksion simbolik duke kritikuar qeverisjen e kryeminsitrit Kurti për zhvillimet dhe situatat e fundit që u krijuan në veri të vendit.
Anëtarët e PSD-së kanë ngjyrosur me ngjyrë të zezë dritaret e ndërtesës së qeverisë, që sipas tyre tregojnë mbylljen kundrejt qytetarëve.
Kryetari i PSD-së, Dardan Molliqaj, gjatë këtij aksioni është shprehur se kryeministri Kurti ka vendosur në terr informativ të gjithë qytetarët për zhvillimet në veri dhe propozimin franko-gjerman.
“Dritaret e kësaj qeverie i ngjyrosëm me të zezë sepse ajo çfarë ka brenda nuk shihet jashtë. Dialog jodemokratik e jotransparent. Dialog i mbyllur. Qeveri që mirëmbanë terr informativ për qytetarët e mediat. Nuk njeh Kosova situatë të tillë, që nga paslufta. Ndërtesa e qeverisë është bërë hapësirë e bunkerizuar që ikë nga publiku”, ka shkruar Molliqaj.
Molliqaj ka shtuar se janë “në dijeni që prej vitit të kaluar e deri më sot Kurti e Bislimi kanë qenë pjesëmarrës në dialog të fshehtë në Bruksel”, sipas tij kulminacioni i këtij dialogimi është propozimi franko-gjerman.
“Publiku asnjëherë nuk u njoftua për përmbajtjen e këtij propozimi përmes kanaleve zyrtare të qeverisë. E pastaj na thonë pse po spekuloni mbi spekulime. Atëherë po komentojmë mbi këtë terr informativ në të cilin është vendosur qytetari”, ka shtuar tutje Molliqaj.
Kryetari i PSD-së ka theksuar se thirrja e tyre është e qartë. “Dialogu duhet të jetë i hapur, gjithëpërfshirës e transparent. Rezultati i tij duhet të sjellë marrëveshje përfundimtare me njohje e paqe”, ka thënë Dardan Molliqaj.
Të shtunën e pesë nëntorit, kanë dhënë dorëheqje pjesëtarët serbë të Policisë së Kosovës, ata të gjyqësorit dhe prokurorisë në veri.
Paralajmërimet e Listës Serbe për largimin nga institucionet e Kosovës kanë ardhur pas vendimit të autoriteteve të Kosovës për suspendimin e drejtorit të Policisë së Kosovës për rajonin e veriut, Nenad Gjuriq.
Kryetari i Listës Serbe, Goran Rakiq, ka treguar se deri kur do të zgjasë bojkotimi i institucioneve të Kosovës nga komuniteti serb.
“Këto vendime do të mbesin në fuqi derisa Prishtina vazhdon të mos respektojë të drejtën ndërkombëtare, që i bie të kthejë prapa vendimin për regjistrimin, derisa të miratojë Asociacionin e Komunave”, ka thënë Goran Rakiq.
Ndërsa, të dielën e gjashtë nëntorit, serbët kanë organizuar protestë në sheshin “Car Lazar” në Mitrovicë të Veriut.
Në këtë protestë kanë marrë pjesë kryetari i Listës Serbe, Goran Rakiq me pjesëtarët e Listës Serbe dhe kryetari i komunës së Shtërpcës, Dalibor Jevtiq.