Kryeprokurori i Prokurorisë Speciale të Republikës së Kosovës (PSRK), Blerim Isufaj, ka refuzuar kërkesën për përjashtimin e prokurorit special Bekim Kodraliu nga lënda që lidhet me shpërthimin në kanalin e Ibër-Lepencit në Varagë të Zubin-Potokut.
Kërkesa e mbrojtjes për përjashtimin e prokurorit Kodraliu ishte bërë gjatë seancës fillestare më 24 dhjetor 2025 nga mbrojtja e të akuzuarve për sulmin në Ibër-Lepenc.
Gjykimi për sulmin në Iber Lepenc, kërkohet përjashtimi i prokurorit special
Lajmin e ka konfirmuar zëdhënësja e PSRK-së, Arbnora Luta.
“Prokuroria Speciale e Republikës së Kosovës ju njofton se kërkesa e mbrojtjes për përjashtimin e prokurorit special nga rasti penal në fjalë është refuzuar”, thuhet në përgjigjen e Lutës për Betimi për Drejtësi.
Në këtë rast akuzohen dy vëllezërit Dragisha dhe Jovan Viqentijeviq, si dhe Igor Dimoviq, të cilët sipas aktakuzës së ngritur më 9 dhjetor 2024, kanë vendosur eksploziv në kanalin Ibër-Lepenc më 29 nëntor 2024. Shpërthimi shkaktoi dëme të konsiderueshme në infrastrukturën e furnizimit me ujë dhe energji elektrike, duke ndërprerë furnizimin për qytetarët dhe Korporatën Energjetike të Kosovës (KEK), me vlerë të dëmeve materiale prej 376,774.70 euro.