Zona të gjera të Fushë Kosovës, Drenasit, Obiliqit, një pjesë e lagjes Kalabria në Prishtinë, si edhe pikat e larta të lagjes Arbëria, kanë mbetur pa ujë të pijshëm për shkak të turbullirave në kanalin e Ibër-Lepencit, të shkaktuara nga punimet që po kryhen aty.
Sipas njoftimit të Kompanisë Rajonale të Ujësjellësit “Prishtina”, impianti i trajtimit të ujit në Shkabaj ka dalë jashtë funksionit që nga ora 05:00 e mëngjesit.
Kjo situatë pritet të shkaktojë reduktime dhe ndërprerje të furnizimit edhe në disa zona tjera të kryeqytetit.
“K ekipet tona janë në terren dhe po e monitorojnë gjendjen vazhdimisht. Furnizimi me ujë do të rikthehet menjëherë sapo të stabilizohen parametrat në kanalin furnizues”, thuhet në njoftim.
Ujësjellësi ka kërkuar falje për shqetësimet, duke theksuar se kompania nuk ka faj, pasi kanali nuk menaxhohet nga KRU “Prishtina”.
Ndërkohë, me impiantet në Albanik dhe Badoc po vazhdohet trajtimi i ujit me kapacitet maksimal.