Fituesi i Çmimit Nobel për Paqe dhe ish-kryeredaktori i gazetës së pavarur ruse “Novaya Gazeta”, Dmitry Muratov, ka deklaruar për BBC-në se presidenti rus, Vladimir Putin, nuk mund të pretendojë më fitore në Ukrainë, pavarësisht parashikimeve të tij për fitoren e Rusisë.
Në zyrat e “Novaya Gazeta” në Moskë, sot mbizotëron heshtja, ndërsa gazeta, e cila për më shumë se tri dekada u bë një nga zërat kryesorë të gazetarisë së pavarur në Rusi, nuk publikohet më në formën e saj të mëparshme.
“Nuk ka më gazetë”, ka thënë Muratov për BBC-në.
Muratov bashkëthemeloi “Novaya Gazeta” më shumë se 30 vjet më parë. Gazeta u bë e njohur për raportimet e saj mbi shkeljet e të drejtave të njeriut dhe korrupsionin në nivele të larta të pushtetit.
Në vitin 2021, Muratov u nderua me Çmimin Nobel për Paqe, së bashku me gazetaren filipinase Maria Ressa, për përpjekjet për mbrojtjen e lirisë së shprehjes. Komiteti Nobel theksoi se gjashtë gazetarë të “Novaya Gazeta” ishin vrarë, përfshirë gazetaren e njohur Anna Politkovskaya, e cila kishte raportuar për luftën në Çeçeni.
Megjithatë, çmimi Nobel nuk e mbrojti gazetën nga presioni i autoriteteve ruse.
Sipas Muratovit, autoritetet ruse urdhëruan shtetëzimin e shtypshkronjave të gazetës dhe i revokuan regjistrimin. “Novaya Gazeta” vazhdon të ketë një prani online, por faqja e saj është bllokuar në Rusi dhe mund të qaset vetëm nga jashtë vendit ose përmes VPN-ve.
Muratov e lidh situatën e gazetës me goditjen e gjerë ndaj lirisë së shprehjes në Rusi, e cila është përshkallëzuar pas nisjes së pushtimit në shkallë të plotë të Ukrainës në vitin 2022.
“Shumica e figurave të opinionit publik janë shpallur ‘agjentë të huaj’, ‘ekstremistë’ ose ‘terroristë’”, ka thënë ai, duke shtuar se numri i tyre është disa qindra.
Sipas vlerësimit të Muratovit, të paktën 1,500 persona ndodhen aktualisht në burg në Rusi për shkak se kanë kundërshtuar politikën e shtetit që nga fillimi i luftës në Ukrainë.
Ai e ka krahasuar këtë situatë me represionin politik gjatë periudhës së Bashkimit Sovjetik.
Ndërkohë, lufta në Ukrainë, të cilën Kremlini në vitin 2022 e paraqiti si një operacion të shkurtër ushtarak, është shndërruar në konfliktin më të përgjakshëm në Evropë që nga Lufta e Dytë Botërore.
Pavarësisht kësaj, presidenti Putin vazhdon të parashikojë fitoren e Rusisë.
Por Muratov e kundërshton këtë pretendim.
“Nuk do të ketë kurrë ‘fitore’”, ka deklaruar ai. Sipas tij, pavarësisht mënyrës se si do të përfundojë lufta, ajo nuk mund të konsiderohet më fitore.
“Nuk mund të jetë fitore kur dy kombe sllave kanë copëtuar më shumë se një milion njerëz”, ka thënë Muratov.