Adoleshentët 16 dhe 17 vjeç në Mbretërinë e Bashkuar do t’i nënshtrohen një kufizimi të ri për përdorimin e rrjeteve sociale gjatë natës, sipas një plani të shpallur nga qeveria.
Megjithatë, ata do të kenë mundësinë ta çaktivizojnë këtë kufizim duke ndryshuar cilësimet e llogarisë së tyre.
Sipas propozimit, aplikacione si Instagram, TikTok dhe YouTube do të bllokohen automatikisht për këtë grupmoshë nga ora 00:00 deri në 06:00, shkruan BBC, transmeton Dukagjini.
Qeveria synon gjithashtu të çaktivizojë si parazgjedhje funksione që konsiderohen varëse, si “autoplay” dhe “infinite scroll”, duke argumentuar se këto masa do të përmirësojnë përqendrimin e të rinjve, cilësinë e gjumit dhe kohën që kalojnë me familjen.
Plani vjen pas njoftimit të qeverisë në qershor se fëmijët nën 16 vjeç do të ndalohen plotësisht nga përdorimi i një sërë platformash të rrjeteve sociale.
Ministri për Sigurinë Online, Kanishka Narayan, mbrojti masën duke thënë se kombinimi i kufizimit gjatë natës me çaktivizimin e funksioneve varëse do ta bëjë Britaninë “një nga vendet me rregullimin më të fortë në botë” ndaj kompanive të teknologjisë.
Sekretarja për Teknologjinë, Liz Kendall, deklaroi se masat janë të rëndësishme për t’i ndihmuar të rinjtë të flenë më mirë, të përqendrohen në shkollë dhe të kalojnë më shumë kohë me familjen dhe miqtë.
Ndërkohë, opozita konservatore e ka kritikuar planin, duke e cilësuar atë si një “rrëmujë”, me argumentin se një kufizim që mund të çaktivizohet lehtësisht nuk do të ketë efekt real.
Qeveria njoftoi gjithashtu se po përgatit masa të tjera për ta bërë më të sigurt përdorimin e chatbot-eve me inteligjencë artificiale nga fëmijët, duke përfshirë vendosjen e ndalimeve të detyrueshme për përdoruesit nën 18 vjeç.
Masat pritet të paraqiten në Parlament deri në fund të vitit 2026 dhe të hyjnë në fuqi së bashku me ndalimin e rrjeteve sociale për fëmijët nën 16 vjeç, që planifikohet për pranverën e ardhshme.
Megjithatë, organizatat për mbrojtjen e fëmijëve dhe ekspertët kanë ngritur dyshime mbi efektivitetin e një shtetrrethimi dixhital pas mesnate. Profesoresha Sonia Livingstone nga London School of Economics paralajmëroi se një kufizim i tillë mund t’i pengojë të rinjtë vulnerabël të kërkojnë ndihmë ose mbështetje në momentet kur kanë më shumë nevojë.
Sa i përket përdorimit të VPN-ve, qeveria britanike deklaroi se nuk planifikon të vendosë kufizime për momentin, pasi ato përdoren edhe për mbrojtjen e privatësisë, nga sinjalizuesit e shkeljeve dhe grupet e cenueshme.
Sipas një studimi të porositur nga qeveria, nuk ka prova të mjaftueshme se fëmijët po i përdorin gjerësisht VPN-të për të shmangur kontrollet e moshës.