Qeveria e Kosovës, të mërkurën e 28 dhjetorit, pritet të mbajë mbledhjen e radhës, duke filluar nga ora 10:00.
Në rend dite do të jenë 36 pika.
Qeveria do të shqyrtojë Projektligjin për Arsimin e Lartë, shqyrtimin e Projektligjit për të Drejtat e Autorit dhe të Drejtat e Përafërta, shqyrtimin e projekt-rregullores për Klasifikimin e Vendeve të Punës në Shërbimin Civil.
Përveç miratimit të ekstrakteve të procesverbaleve nga mbledhjet 108 dhe 110, Qeveria do të shqyrtojë Projektligjin për Arsimin e Lartë, shqyrtimin e Projektligjit për të Drejtat e Autorit dhe të Drejtat e Përafërta, shqyrtimin e projekt-rregullores për Klasifikimin e Vendeve të Punës në Shërbimin Civil.
Po ashtu, Qeveria në këtë mbledhje do të shqyrtojë Projekt-udhëzimin e Administrativ për Mënyrën dhe Procedurat e Shitjes dhe Dhënies me Qira të Pasurisë së Luajtshme dhe të Paluajtshme të Sekuestruar dhe të Konfiskuar.
Mes tjerash, në mbledhjen e 116-të do të shqyrtohet Propozim-vendimi, me të cilin, Qeveria e Republikës së Kosovës jep mendim dhe pajtohet me kandidaturat e propozuara nga Paneli Seleksionues për përzgjedhjen e anëtarit joekzekutiv të Bordit të Bankës Qendrore të Republikës së Kosovës.
Tjetër pikë e rendit të ditës është shqyrtimi i Propozim-vendimit për miratimin e Kalendarit Vjetor të Përkthimit 2023 të Acquis së BE-së.
Gjithashtu, qeveria do të shqyrtojë propozimin e vendimit për ndarjen e mjeteve financiare për Ministrinë e Punëve të Jashtme dhe Diasporës, për pranimin e pesë gazetarëve nga Afganistani.
Pos ndarjes së mjeteve, ata do të shqyrtojnë Propozim-vendimin për ofrimin e mbrojtjes së përkohshme dhe të menjëhershme për pesë gazetarë nga Afganistani.
Pika e dhjetë e rendit të ditës do të jetë propozim-vendimi për shqyrtimin Publik dhe Planin për Menaxhimin e Pellgjeve Lumore.
Tjetër pikë është edhe shqyrtimi i propozim-vendimit për emërimin e Mekanizmit ndërinstitucional për zbatimin e Strategjisë Kombëtare dhe Planit të Veprimit për Menaxhimin dhe kontrollin e Qenve me dhe pa pronar.
Kjo mbledhje po mbahet kur edhe shënon dita e 19-të e barrikadimit të veriut.
Që nga 10 dhjetorit, në rrugët e veriut të Kosovës serbët lokalë kanë ngritur barrikada në shenjë pakënaqësie me arrestimin e një ish-pjesëtari serb të Policisë së Kosovës, Dejan Pantiq, për të cilin, autoritetet në Kosovë thonë se i ka organizuar sulmet ndaj zyrave të Komisionit Qendror të Zgjedhjeve në veri.
Që nga ajo ditë, forcat e policisë së Kosovës vazhdojnë të jenë të dislokuara në veri.
Ndërkaq, që nga 6 dhjetori, në katër komunat në veri të Kosovës – Mitrovicë të Veriut, Zveçan, Leposaviq dhe Zubin Potok – janë shënuar disa incidente të armatosura.
Sulme ka pasur edhe ndaj Policisë së Kosovës.
Për t’u kujdesur për sigurinë e qytetarëve në atë pjesë të Kosovës, janë shtuar patrullime edhe nga ana e KFOR-it e EULEX-it.
Të njëjtat barrikada vazhdojnë të qëndrojnë ende të palëkundura përkundër thirrjeve ndërkombëtare që ato të hiqen menjëherë.
Ndërkaq, të martën e 27 dhjetorit, është mbyllur pikëkalimi kufitar në Merdar, për shkak të vendosjes së barrikadave në Serbi rreth dy kilometra nga kufiri.
Kështu njoftoi Qendra Kombëtare për Menaxhim Kufitar në Kosovë.
Merdarja – një prej pikëkalimeve kufitare me Serbinë – përdoret në masë të madhe nga diaspora kosovare për hyrje-dalje nga Kosova.