Qeveria e Gjermanisë ka uruar Kosovën dhe Serbinë për pajtimin në Ohër lidhur me aneksin e implementimit të Marrëveshjes bazë të normalizimit të marrëdhënieve.
Zëdhënësi i Qeverisë së Gjermanisë, Steffen Hebstreit, ka thënë se tani duhet të zbatohet marrëveshja që është rënë dakord mes dy palëve.
Sipas tij, kjo ndihmon në vendosjen e marrëdhënieve mes Kosovës dhe Serbisë në rrugën e duhur.
“Ju përgëzoj për këtë përparim për të vendosur marrëdhëniet mes Serbisë dhe Kosovës në një rrugë të re. Tash gjithçka ka të bëjë me marrjen e drejtimit për të ruajtur dhe ndjekur atë që është dakorduar. Ne do të jemi me ju që të përmbushni perspektivën tuaj evropiane”, ka shkruar në Twitter zëdhënësi i Qeverisë së Gjermanisë.
Congratulations on this breakthrough to put the relationship between #Serbia and #Kosovo on a new footing! Now it is all about taking leadership for keeping and implementing what is agreed. We will be at your side to fulfill your European perspective! https://t.co/DFLI7bTywL
— Steffen Hebestreit (@RegSprecher) March 19, 2023
Në anën tjetër, kjo marrëveshje është vlerësuar edhe nga ambasadori i Gjermanisë në Kosovë, Jorn Rohde.
“Vërtetë, pa vonesa, tash duhet progres i shpejtë në të gjitha çështjet e dakorduara”, ka shkruar Rohde në Tëitter.
Më 18 mars në Ohër, Kosova dhe Serbia u pajtuan që të fillojnë zbatimin e Marrëveshjes për normalizimin e raporteve sa më shpejt që të jetë e mundur. Megjithatë, atë nuk e nënshkruan zyrtarisht. Në fakt, kryeministri Albin Kurti ka qenë i gatshëm të nënshkruaj, por presidenti serb ka refuzuar.
Ndryshe, Bashkimi Evropian e ka quajtur si shumë të suksesshëm takimin e 18 marsit në Ohër mes kryeministrit të Kosovës, Albin Kurti dhe presidentit serb, Aleksandar Vuçiq, në kuadër të dialogut të nivelit të lartë mes dy vendeve.
Kryediplomati i Bashkimit Evropian, Josep Borell, ka thënë më 18 mars se edhe pse palët kanë vendosur të mos e nënshkruajnë zyrtarisht marrëveshjen, ato janë pajtuar që të fillojnë zbatimin e saj sa më shpejt që të jetë e mundur.
Marrëveshja me 11 nene, e bërë publike më 27 shkurt, nuk e obligon Serbinë që ta njohë Kosovën, por kërkon nga të dyja vendet që t’i pranojnë dokumentet dhe simbolet e njëra-tjetrës, përfshirë: pasaportat, diplomat dhe targat.
Ajo kërkon, po ashtu, nga palët që t’i zbatojnë të gjitha marrëveshjet e arritura deri më tash në dialogun për normalizimin e marrëdhënieve, përfshirë edhe atë për formimin e Asociacionit të komunave me shumicë serbe në Kosovë, të cilin Qeveria në Prishtinë e ka refuzuar deri më tash, me arsyetimin se mund të rrezikojë funksionalitetin e shtetit.