Qeveria e Kosovës, ka bërë të ditur se është miratuar vendimi për të kërkuar nga presidentja e Kosovës, Vjosa Osmani, dhënien e autorizimit zëvendëskryeministrit, Besnik Bislimi, për nënshkrimin e marrëveshjes për bashkëpunim për zhvillim mes Kosovës dhe Luksemburgut.
Po ashtu, u miratua edhe vendimi për të kërkuar nga presidentja Osmani dhënien e autorizimit për Bislimin, për nënshkrimin e amendamentit 2 të Marrëveshjes Financiare mes Kosovës dhe Bashkimit Evropian për Programin IPA 2015.
Ndërkaq, në mbledhje është miratuar edhe nisma për plotësim dhe ndryshim të Marrëveshjes Financiare ndërmjet Kosovës dhe Bashkimit Evropian për Programin IPA 2014.
Instrumentin për Ndihmën e Para-anëtarësimit (IPA), është instrument financiar i shfrytëzuar nga BE-ja, që ka synim të ndihmojë vendet që janë në procesin e anëtarësimit në BE.
Objektivat kryesore të IPA-s përfshijnë forcimin e institucioneve demokratike, reformimin e administratës dhe ekonomisë, promovimin dhe mbrojtjen e të drejtave dhe lirive të njeriut, përmirësimin e respektimit të të drejtave të minoriteteve dhe zhvillimin e shoqërisë civile.