Të mërkurën e 20 korrikut, në mbledhjen e 89-të, Qeveria e Kosovës ka vendosur të ndajë 5.5 milionë euro për të vazhduar shtesat mbi pagën bazë për stafin shëndetësor, si vazhdimësi e masave të marra për luftën kundër COVID-19.

Ministri i Financave, Hekuran Murati, ka thënë se në kuadër të masave të marra për luftën kundër COVID-19, mbështetja fillestare ishte paraparë deri në fund të muajit qershor.

Ai ka thënë se me rikthimin e numrave të rasteve me COVID-19 dhe ndryshimin e situatës, konsiderojnë që mbështetja duhet të vazhdojë.

“Pra 10 për qind e pagës bazë. Parashihet të ndahen mjete në shumën prej 5.5 milionë eurosh”, ka thënë ai.

Po ashtu, për tre muaj është shtyrë afati i miratimit i Ligjit për Shëndetësinë në Qeveri.

Përderisa afati i paraparë me agjendën legjislative deri sot ishte 30 shtatori, me vendimin e së mërkurës, Qeveria e ka shtyrë deri më 26 dhjetor miratimin e këtij ligji.