Qeveria e Kosovës, në mbledhjen e sotme e cila u mbajt në mënyrë elektronike, i ka ndarë gjashtë milionë e treqind e njëzetë e tre mijë e treqind e tetëdhjetë euro për subvencionimin e teksteve shkollore për klasat një deri në pesë.
Kurse gjashtë milionë e gjashtëqind e shtatëmbëdhjetë mijë e treqind e katërdhjetë euro për klasat një deri nëntë.
“Qeveria e Republikës së Kosovës ka zhvilluar sot, në mënyrë elektronike, mbledhjen e radhës në të cilën ka ndarë 6,323,380 (gjashtë milionë e treqind e njëzetë e tre mijë e treqind e tetëdhjetë) euro për subvencionimin e teksteve shkollore për klasat 1-5, dhe 6,617,340 (gjashtë milionë e gjashtëqind e shtatëmbëdhjetë mijë e treqind e katërdhjetë) euro për subvencionimin e materialeve mësimore për klasat 1-9”, thuhet në njoftim.
Ministrja e Arsimit, Arbërie Nagavci, ka deklaruar se ankesat e qytetarëve për procesin e furnizimit të librave janë duke u shqyrtuar nga Ministria e Arsimit, Shkencës, Teknologjisë dhe Inovacionit (MASHT).
Me anë të një postimi në Facebook, ministrja Nagavci ka deklaruar se ankesat e qytetarëve janë pranuar dhe se pagesat për nxënësit 5-vjeçar do të bëhen pas verifikimit të rasteve.
Vendimi për subvencionimin e teksteve shkollore është kritikuar nga partitë opozitare të cilat kanë shprehur shqetësimin se viti i ri shkollor mund t’i gjejë fëmijët pa librat e nevojshëm.