“Qeveria e Kosovës jep zotimin që të shtyhet zbatimi i dy vendimeve të datës 29 qershor 2022, deri më datën 1 shtator 2022, nga momenti në ditën e hënë, 1 gusht 2022, kur do të hiqen të gjitha barrikadat dhe të vendoset liria e plotë e lëvizjes në të gjitha rrugët në veri të Kosovës”.
Kështu thuhet në njoftimin e qeverisë, ku theksohet se Qeveria e Kosovës ka dënuar ashpër bllokimin e rrugëve në veri të Kosovës dhe të shtënat nga njerëz të armatosur të strukturave ilegale atje.
“Kryeministri Kurti së bashku me Presidenten Osmani dhe zëvendëskryeministrat, Bislimi e Gërvalla kanë zhvilluar kontakte e takime me faktorët ndërkombëtarë amerikanë dhe evropianë”, thuhet në njoftim.
Sipas njoftimit, bëhet fjalë për tendencë për destabilizimin e Kosovës dhe rrezikimin e paqes dhe sigurisë së qytetarëve dhe vendit.
“Akte agresive të shumta ka pasur në pasditen dhe mbrëmjen e sontme të nxitura e të përgatitura nga Beogradi zyrtar. Falenderojmë partnerët ndërkombëtarë, në veçanti ambasadorin amerikan Jeffrey Hovenier, për angazhimin dhe kontributin”, vijon njoftimi.
Ndryshe, Ambasadori i Shteteve të Bashkuara të Amerikës në Kosovë, Jeff Hovenier ka kërkuar shtyrjen e implementimit të vendimeve të Qeverisë së Kosovës për 30 ditë.
Ambasadori i SHBA-së, Hovenier është takuar me Presidenten e Kosovës, Vjosa Osmani, Kryeministrin Kurti dhe dy zëvendëskryeministrat, Besnik Bislimi dhe Donika Gërvalla.
Ai ka thënë se ka kërkuar nga Qeveria e Kosovës që të shtyjë implementimin e vendimeve të marra nga mbledhja e Këshillit të Sigurimit Kombëtar të Kosovës, e mbajtur mëngjesin e së dielës.
Ai ka thënë se tensionet në veri të Mitrovicës kanë ardhur si shkak i dezinformimit dhe informimit jo të mjaftueshëm të dy vendimeve.
“ShBA-ja nuk ka pasur shqetësim për vendimin. Kam pasur takim me presidenten Osmani, kryeministrin Kurti, zëvendëskryeministrin Bislimi dhe ministren e Jashtme Gërvalla, për të bërë një kërkesë të qartë nga Qeveria e ShBA-së që të shtyhet implementimi i vendimit për 30 ditë. Mendoj se shtyrja e implementimit do të ishte e nevojshme, pasi duket se ka pasur dezinformata dhe keqkuptime për vendimin”, ka thënë ai.
Ndër të tjera, ai ka theksuar se nuk është duke kërkuar largimin e plotë të vendimeve, por vetëm kohën për t’i qartësuar ato.
“Mendoj se shtyrja e implementimit do të ishte e nevojshme, pasi duket se ka pasur dezinformata dhe keqkuptime për vendimin. Shpresojmë të punojmë me partnerët tanë në BE që të reduktohen tensionet. Ne nuk po kërkojmë anulimin e vendimit, të jem i qartë, por shtyrjen”, ka thënë Hovenier.
Njëherësh, Hovenier ka theksuar se vendimet e palës kosovare nuk bien ndesh me marrëveshjet e Brukselit.