Në Kosovë po shënohet 9 maji, Dita e Evropës.
Qeveria e Kosovës konsideron se hap pas hapi, Kosova po i afrohet Bashkimit Evropian.
“Qytetarët e vendit tonë, të cilët përqafojnë dhe i mishërojnë vlerat evropiane, mund të ndihen tashmë më afër Evropës. Kosova gjendet në një trajektore të vendosur në rrugën drejt BE-së, në një proces të pakthyeshëm”, thuhet në një njoftim për media, ku urohet për Ditën e Evropës.
Në Ditën e Evropës, Qeveria riafirmon projektimin e Kosovës drejt integrimit në Bashkimin Evropian.
“Vetëm gjatë vitit të fundit, vendi ynë ka bërë hapa të rëndësishëm në rrugëtimin e integrimit evropian si votimi i parë pozitiv në fazat drejt anëtarësimit në Këshillin e Evropës, përmbyllja e procesit të liberalizimit të vizave dhe aplikimi për anëtarësim në Bashkimin Evropian”, vijon njoftimi.
Sipas njoftimit të lëshuar nga qeveria, kjo ditë kujton deklaratën e ministrit të jashtëm francez, Robert Schuman, i cili foli për herë të parë për idenë e Evropës.
“Evropën, e cila nuk do të ishte më një kontinent i shkatërruar nga luftërat dhe rivalitetet, por një projekt politik i paqes, prosperitetit dhe lirisë. Ai thoshte se: “Paqja botërore nuk mund të ruhet pa ndërmarrjen e përpjekjeve kreative në proporcion të drejtë me rreziqet që e kërcënojnë atë”.
E në sfidat me të cilat po përballet tashmë Evropa, sipas Qeverisë së Kosovës, uniteti dhe paqja janë domosdoshmëri për një të ardhme të lirë, demokratike e prosperuese.