Federata e Karatesë së Kosovës ka dy ditë që ndodhet në Larnaka të Qipros, ku po zhvillohet Kampionati Evropian për kadet, junior dhe për grupmoshat U21.
Mirëpo, në këtë kampionat nuk po lejohen simbolet shtetërore të Kosovës.
Përmes një komunikate zyrtare, Federata e Karatesë së Kosovës (FKK), ka bërë të ditur se karateistëve kosovarë nuk iu lejohet gara me simbole shtetërore nga institucionet e Qipros.
“Sot pas shumë përpjekjesh NUK u lejuam të marrim pjesë si të barabartë me 48 shtetet evropiane pjesëmarrëse në këtë kampionat zyrtar të EKF(Federata Evropiane e Karatesë) meqenëse na u mohua e drejta për përfaqësim me simbolet shtetërore nga institucionet shtetërore të Qipros”, shkruhet në komunikatën e FKK-së.
Tutje, në komunikatën e FKK-së, thuhet që “dëshpërimi nga nënçmimi ndjehet fuqishëm tek të gjithë anëtarët e ekipit kombëtar dhe më gjerë. Përgjatë kësaj periudhe kontakti i vazhdueshëm mes MKRS dhe FKK ka qenë intensiv dhe me qëndrim të përbashkët që të respektohet pjesëmarrja e barabartë në evente sportive”.
Në vitet e fundit, përkundër rregullave të sportit ku kërkohet që të mos përfshihet politika, Kosova shpesh herë është detyruar të garojë në evente të ndryshme sportive pa pasur të drejtën që të shfaq simbolet e shtetit.