Deputeti i zgjedhur i Lëvizjes Vetëvendosje, Vigan Qorrolli ka thënë se qasja e PDK-së në raport me zgjedhjen e presidentit nuk është opozitë, por sipas tij është sabotim i vet shtetit.
Ai kështu është shprehur ku i është referuar deklaratës së nënkryetares së PDK-së, Vlora Çitaku, që sipas Qorrollit, Çitaku ka thënë se “PDK nuk do të marrë pjesë në zgjedhjen e Presidentit, ‘sepse, siç tha ajo, zgjedhja e Presidentit i zgjat edhe katër vjet mandatin qeverisës Albin Kurtit”.
Qorrolli tha kjo tregon që nuk është çështja e presidentit por refuzimi për ta pranuar vullnetit e qytetarëve të shprehur në zgjedhje.
“Pra, nuk qenka në pyetje Presidenti. As Kushtetuta. As demokracia. As interesi i Republikës. Në pyetje është vetëm etja për pushtet dhe frika nga verdikti i popullit. Problemi është se nuk e pranojnë verdiktin e qytetarëve tash e 4 parë zgjedhje!Kjo nuk është opozitë. Është sabotim i vetë shtetit. Është gatishmëri për të mbajtur peng institucionet, vetëm që të mos funksionojë rendi kushtetues kur ai nuk u shërben interesave të tyre partiake”, ka shkruar Qorrolli të dielën në Facebook.
Partia Demokratike e Kosovës ka marrë qëndrim që në legjislturën e 11-të të qëndrojë në opozitë. Këtë e kishte bërë të ditur kryetari i PDK-së, Bedri Hamza pas takimit që kishte zhvilluar me kryetarin e LVV-së, Albin Kurti për formimin e institucioneve.
Ndërsa, nënkryetarja e PDK-së Vlora Çitaku të premten tha se nuk shohin hapësirë për bashkëpunim, pasi siç tha ajo “jemi vite larg”.