Shtetet e Quint-it, Franca, Italia, Gjermania, Mbretëria e Bashkuar dhe Shtetet e Bashkuara të Amerikës, kanë ritheksuar se zgjedhjet e mbajtura në katër komunat veriore të Kosovës, janë në përputhje me Kushtetutën dhe ligjet e Kosovës.
Megjithatë, këto shtete vlerësojnë se pas bojkotit nga shumica e popullsisë serbe në ato zona, rezultatet e atyre zgjedhjeve “nuk janë zgjidhje politike afatgjata”.
Shtetet e QUINT-it, kanë kërkuar të mos ketë tensione në ditën kur pritet të bëhet betimi i kryetarëve të rinj.
Po ashtu, në reagimin e tyre thuhet se jo medoemos betimi i tyre duhet të bëhet në objektet komunale.
“Nuk duhet të ketë veprime apo iniciativa – përfshirë kryetarët e sapozgjedhur të komunave dhe kuvendet komunale – që nuk i shërbejnë popullit ose që mund të rrisin tensionet. Kjo përfshin ushtrimin e më shumë se kompetencave administrative dhe procesin e marrjes së detyrës pasi nuk ka kërkesë që kryetarët e komunave të bëjnë betimin në zyrat komunale. Të gjitha palët duhet të përmbahen nga përdorimi i forcës ose veprimet që ndezin tensionet ose nxisin konfliktin”, thuhet në reagim.
Në fund, thuhet se shtetet e QUINT-it e mbështesin dialogun e lehtësuar nga BE-ja në mes të Kosovës dhe Serbisë, teksa kanë kërkuar urgjentisht themelimin e Asociacionit të Komunave me shumicë serbe.