Ish-Kryetari i Malishevës, Ragip Begaj, është dënuar me gjashtë muaj burgim.
Begaj akuzohet se në pozitën e kryetarit të Komunës së Malishevës, duke shfrytëzuar autoritetin zyrtar, i ka tejkaluar kompetencat e tij duke i shkaktuar dëm personit me inicialet R.R. dhe buxhetit të Komunës, me rastin e ndërtimit të një shkolle në fshatin Drenoc.
“Jam i njoftuar për vendimin e Gjykatës, 5.000 euro gjobë ose gjashtë muaj burgim. Vendimi është i padrejtë për arsye sepse e kam nënshkruar një marrëveshje dhe janë marrë shtatë ari, diku 85 për qind e pronës është komunale. Nuk e kam besuar asnjëherë që do të marrin këtë vendim, por unë e respektoj vendimin e gjykatës edhe pse është i padrejtë”, ka thënë Begaj.
“Unë nuk kam marrë informatë ende, zyrtare nuk kam marrë kurrgjë. Nuk kam dijeni kurrgjë, nuk jam në dijeni për çka”, ka shtuar Begaj. Per kete vendim të organeve të rendit, Begaj është shprehur se është i padrejtë.
Aktgjykimi është shpallur nga gjykatësja Violeta Namani, ku thuhet se më 7 prill 2021, Begaj ka caktuar lokacionin për ndërtimin e shkollës fillore në Panorc. Një pjesë e shkollës ishte e planifikuar të ndërtohej në pronë private, në kundërshtim me vendimin e Kuvendit Komunal të 4 majit 2018. Ky vendim kishte për qëllim ndërtimin e aneksit të shkollës “Visar Krasniqi” në fshatin Drenoc të Malishevës.
Begaj ishte kryetar i Malishevës deri në zgjedhjet e fundit lokale që u mbajtën në nëntor të vitit 2021.