Në mëngjesin e së hënës, para objektit komunal të Zveçanit janë parë edhe kryetari dhe nënkryetari i Listës Serbe, Goran Rakiq dhe Igor Simiq.
Ata kanë qenë prezentë edhe përgjatë javës së kaluar në protesta, raporton Rel.
Të dy i kanë bërë thirrje të vazhdueshme pjesëtarëve të KFOR-it që të jenë garantuesit e vetëm të sigurisë në atë pjesë dhe që të mos ketë pjesëtarë të Policisë së Kosovës.
Lista Serbe, partia kryesore e serbëve në Kosovë, i ka bojkotuar zgjedhjet e prillit për kryetarë të komunave në veri.
Ajo, po ashtu, u ka bërë thirrje edhe qytetarëve që të mos dalin në zgjedhje. Serbët lokalë në tri komunat e veriut janë duke mbajtur protesta rregullisht, prej 29 majit.