Pas shumë përplasjesh në mes të kryeministrit Shqipërisë dhe ish-kryeministrit kosovar, këta janë takuar me 5 prill në Shqipëri.

Kryeministri i Shqipërisë, Edi Rama ka mirëpritur të martën në takim liderin e Aleancës për Ardhmërinë e Kosovës (AAK), Ramush Haradinaj.

Temat kryesorë të këtij takimi me kryeministrin, Edi Rama, ishin bashkëpunimi mes Kosovës dhe Shqipërisë në fushën e ekonomisë, infrastrukturë, siguri e politikë të jashtme, ka bërë të ditur Ramush Haradinaj me anë të një postimi në rrjetin social Facebook.

“Bashkëbiseduam gjithashtu për projektin e Hekurudhës Prishtinë – Durrës si projekt i domosdoshëm për të dyja vendet, si dhe dhënien e dyshtetësisë për qytetarët tanë”, ka shtuar ai.

Ky i fundit, kishte falënderuar kryeministrin Rama për ndihmën e shtetit shqiptar gjatë krizës energjetike në Kosovë.

“Nevoja për bashëpunim të ngushtë në mes dy vendeve në ketë kohë aspak normale është e patjetërsueshme”.

Edi Rama dhe Ramush Haradinaj

Përplasjet në mes tyre kishin filluar, kur qeveria Haradinaj kishte vendosur taksën prej 100% si masë reciproke ndaj produkteve të Serbisë.

Rama i kishte kërkuar ta pezullojë këtë masë, por Haradinaj e kishte refuzuar.

Rama kishte shkruar se “Askush s’i ka bërë Ramushit presion në Berlin për të hequr taksën. Unë jo e jo. Madje askush as ia ka kërkuar hiç që ta heqë taksën! Unë jo e jo. Përkundrazi”, kishte deklaruar në Facebook.

Situata ishte përkeqësuar saqë kryeministri i Shqipërisë, Edi Rama, e kishte paditur në gjykatë Haradinajn nën akuzat për shpifje.