Pas adresimit të Presidentit të Ukrainës, Volodymyr Zelenskyy para deputetëve në Parlamentin e Shqipërisë, ka folur edhe kryeministri Edi Rama i cili ka është shprehur se shteti i Ukrainës do ta ketë secilën ndihmë që do të mund t’ia jepë Shqipëria.
Kryeministri Rama, tha se Shqipëria nuk i ka mundësitë aq të mëdha sa ta ndihmojë shtetin ukrainas në mënyrë monetare, por që, sipas tij, Shqipëria kudo që do t’i jepet mundësia do ta ngrejë zërin për lirinë e Ukrainës.
Pushtimin e Ukrainës nga Rusia, Rama e ka krahasuar me spastrimin etnik që ka bërë Serbia në Kosovë. Sipas kryeministrit Rama, ekziston një ngjashmëri në mes këtyre dy pushtimeve.
“Edhe pse mizorinë nuk mund ta perceptojmë sa e si duhet, sikurse populli ukrainas, më lejoni t’ju them se historia jonë e afërt ku gjysmë milionë shqiptarë u shpërngulën përmes spastrimit etnik nga trojet e tyre në Kosovë dhe gjetën strehë në Shqipëri në bën ta ndjejmë nga larg dhimbjen e Ukrainës”, ka deklaruar kryeministri Rama.
Tutje ai theksoi se për çështjen e agresionit rus në Ukrainë i gjithë spektri politik në Shqipëri ka qenë njëzëri në mbështetje të shtetit ukrainas.
Sipas tij, rrallëherë ndodh që pozita e opozita të mos kundërshtohen mes vete. Përpos opozitës, ai e përmendi edhe rreshtimin e Kosovës në krah të Ukrainës.
“Janë shumë të rralla rastet ku në këtë parlament palët kanë rënë dakord, dhe mbështetja për Ukrainën është ndër rastet e rralla kur kemi qenë dakord pa bërë asnjë diskutim. Qysh prej orëve të para të pushtimit të Ukrainës, i gjithë populli ynë, përfshirë edhe Kosovën, jemi rreshtuar me ju”, deklaroi Rama.
