Kreu i qeverisë shqiptare Edi Rama, gjatë fjalimit të tij ne Kiev, iu rikujtoi autoriteteve ukrainase dhe vetë Zelenskyy-t, mosnjohjen e Kosovës nga ana e tyre.
Ai tha edhe pse Qeveria e Kosovës mbështet plotësisht Ukrainën, ajo ende nuk e ka njohur.
“Por ka edhe një vend të gjashtë (referuar Ballkanit Perëndimor), që Ukraina ende nuk e ka njohur, Kosova, e cila pavarësisht kësaj, po bën të njëjtën gjë me sanksionet dhe po jep mbështetjen e plotë për Kiev-in”, theksoi fillimisht kryeministri shqiptar.
“Çfarë do të thotë kjo?”, pyet Rama.
“Që këtu jemi në një linjë të asaj çfarë ne përfaqësojmë. Sepse kjo është gjëja e duhur”, shtoi ai.
Kreu i qeverisë shqiptare i garantoi presidentit ukrainas se vendet e Ballkanit Perëndimor nuk e kanë aspak problem që statusi kandidat për BE t’i jepet Ukrainës.
Mes të tjerash, ai shtoi “Ballkani Perëndimor ka 5 vende në Kombet e Bashkuara. Të gjitha janë krah Ukrainës, pavarësisht kontekstit dhe raporteve me Rusinë, sepse është krejt ndryshe se si e shohim botën përkundrejt Rusisë, nëse marrin Shqipërinë dhe Serbinë fjala bie”.