Pas raportimeve dhe pakënaqësive të qytetarëve për rritjen 100% të vlerës së tatimit në pronë, ka reaguar kryetari i Prishtinës Përparim Rama.
Rama e ka hedhur “fajin” tek Ministria e Financave, duke thënë se kjo ministri është autoriteti kompetent për vlerësimin e pronave, ndërsa “Kryeqyteti sipas të njëjtit Ligj, cakton përqindjen e tatimit në pronë në bazë të vlerësimit të Ministrisë”.
Rama tha se Prishtina e ka caktuar për qindjen më të ulët të mundshme për tatimin në pronë.
“Kryeqyteti e ka caktuar përqindjen më të ulët të mundshme të tatimit në pronë. Norma më e ulët e lejuar është 0.15% e shumës së përcaktuar nga Ministria e Financave, Punës dhe Transfereve”, ka thënë ai.
Kryetari i Prishtinës, theksoi se nuk ka pasur asnjë ndikim në rritjen e faturave të tatimit në pronë, por rritja ka ardhë si pasojë e ri-vlerësimit të pronave nga Ministria e Financave.