Kryetari i Prishtinës, Përparim Rama, të premten ka takuar djalin e Hamëz Jasharit, Bekim Jasharin.
Siç ka njoftuar Rama, në takim me Jasharin ka diskutuar për zgjedhjen e lokacionit dhe angazhimin e familjes Jashari në procesin e krijimit e monumentit të Heroit të Kombit, Adem Jashari.
“Për kryeqytetin, është njëkohësisht një privilegj dhe përgjegjësi e madhe të kemi shtatoren e heroit tonë dhe të nderojmë sakrificën e familjes Jashari për lirinë që ne sot gëzojmë”, ka shkruar mes tjerash Rama në Facebook.
Konkurs ndërkombëtar për monumentin e Adem Jasharit
Më 14 mars, është hapur konkursi për krijimin e sheshit monumental të komandantit legjendar, Adem Jashari, që nderon sakrificën e tij dhe të familjes.
Rama ka thënë se ky shesh do të shërbejë jo vetëm si një simbol i sakrificës së familjes Jashari, por edhe si një vend ku brezat e sotëm dhe të ardhshëm mund të mësojnë një prej kapitujve më të rëndësishëm në historinë e vendit.