Kryeministri i Shqipërisë, Edi Rama, në samitin për Ukrainën në Tiranë, i ka uruar mirëseardhje në Shqipëri, presidentit ukrainas, Volodymyr Zelensky.
“Jemi thellësisht të nderuar që bëtë këtë udhëtim në Tiranë mes përgjegjësive të jashtëzakonshme të udhëheqjes, jo vetëm të kombit dhe popullit tuaj, por të gjithë botës sonë demokratike në qëndresën ndaj luftës që aq mizorisht i është imponuar vendit tuaj. Por që në ndërkohë ka sfiduar në mënyrë kaq brutale botën tonë demokratike”, ka thënë Rama.
Kryeministri shqiptar është shprehur se presidenti rus, Vlademir Putin, dëshironte ta fshihte Ukrainën nga harta për çështje ditësh, por sipas Ramës, Ukraina sot është më shumë se kurrë e ankoruar në Evropë dhe me besimplotë se kurrë për fatin e vet evropian.
“Kjo është një luftë që as Ukraina as Bashkësia e Kombeve me të njëjtin qëndrim nuk e zgjodhën, një katastrofë nga zgjedhja e vetme e një njeriu. Prania juaj këtu është një kujtesë që ai nuk ia ka dalë e që pavarësisht fuqisë ushtarake e propagandës toksike, Rusia nuk ia ka dalë të përmbysë qeverinë e zgjedhur në mënyrë demokratike të Ukrainës. Nuk ia ka dalë të shtypë vullnetin e popullit të Ukrainës të jetojë në një atdhe të lirë, të pavarur dhe demokratik. Nuk ia ka dalë të shtypë të vërtetën, kontrasti nuk mund të jetë më i fortë se kaq. Putini donte ta fshihte Ukrainën nga harta për çështje ditësh, por sot Ukraina është më shumë se kurrë e ankoruar në Evropë dhe me besimplotë se kurrë për fatin e vet evropian”, ka thënë tutje Rama.
Rama ka ritheksuar përsëri se Shqipëria vazhdon të mbështesë Ukrainën gjatë periudhës kur ajo është në gjendje lufte.
“…E them herë pas here, mikut tim të dashur, presidentit ukrainas, vetë nuk i kemi kapacitetet për të ofruar mbështetjen financiare e ushtarake për Ukrainën, por i bashkohemi thirrjes për pjesëtarët më të mëdhenj të aleancës sonë…”, është shprehur ai.