Kryetari i Prishtinës, Përparim Rama, ka deklaruar se nëse qeveria i zhbllokon fondet e BERZH-it për ndërtimin e unazës së kryeqytetit, nuk do të ketë nevojë për vendosjen e asnjë tarife për qytetarët.
Rama përmes një postimi në “Facebook” ka thënë se propozimi për vendosjen e një tarife për automjetet që hyjnë në Prishtinë është vetëm një ide për diskutim publik dhe jo një vendim i marrë.
Sipas Ramës, tarifa e mundshme është diskutuar në vlerat 1 deri në 2 euro për automjetet e regjistruara jashtë Prishtinës, ndërsa deri në 10 euro për kamionët e rëndë që qarkullojnë në qendër të kryeqytetit.
“Fjala e fundit i takon qytetarëve të Prishtinës, të cilët janë të lirë të japin idetë dhe sugjerimet e tyre në këtë debat publik”, ka deklaruar Rama.
Ai ka theksuar se Prishtina ka nevojë urgjente për investime infrastrukturore, veçanërisht për ndërtimin e Unazës së Kryeqytetit, projekt që sipas tij do të ulte kolonat, do të lehtësonte qarkullimin dhe do të përmirësonte cilësinë e jetës.
Rama ka shtuar se paketa financiare për këtë projekt arrin rreth 206 milionë euro, prej të cilave deri në 40% janë grant, mjete që nuk do të ktheheshin nga qytetarët.
Ai ka pohuar se këto fonde vazhdojnë të mbeten të bllokuara, duke i mohuar Prishtinës investime të rëndësishme infrastrukturore.
“Arsyeja pse po e shqyrtojmë këtë mundësi është e thjeshtë: Prishtina ka nevojë urgjente për investime të mëdha infrastrukturore, veçanërisht për ndërtimin e unazës së kryeqytetit, një projekt që do të zvogëlonte kolonat, do të lehtësonte qarkullimin, do të reduktonte ndotjen dhe do të përmirësonte cilësinë e jetës për të gjithë. Po e ritheksoj se kjo nuk është një tarifë e planifikuar apo e vendosur. Po diskutohet si alternativë në rast se fondet e BERZH-it vazhdojnë të mbeten të bllokuara nga kjo qeveri”, ka shkruar ai.
Sipas Ramës, propozimi për tarifën e kongjestionit është vetëm një alternativë që po shqyrtohet për shkak të bllokadave financiare.